ကိုယ်တိုင်သက်သေ

တစ်ခါမှာ ဘာသာရေး ပုဂ္ဂိုလ်တွေ အပါအ၀င် လူတစ်စုဟာ ဂျီးဇက် (Jesus Christ) ထံ ပြည့်တန်ဆာမတစ်ဦးကို ခေါ်လာကြတယ်. . . ဒီအမျိုးသမီးဟာ မကောင်းတဲ့ အကျင့်ကို ပြုတဲ့အတွက် အပြစ်ရှိတယ်ဆိုပြီး ဒီလူတွေက ခေါ်လာကြတယ် . . .

ဂျီးဇက်ဆီရောက်တဲ့ အခါမှာ အဲဒီဘာသာရေး ပုဂ္ဂိုလ်တွေက ပြည့်တန်ဆာကို ကျောက်ခဲနဲ့ပစ်ပေါက် အပြစ်ပေးရမယ်လို့ မောရှေ (Moses) က အမိန့်ချတဲ့အကြောင်း ၊ ဒီကိစ္စမှာ အသင်က ဘယ်လိုပြောဆို မိန့်မြွက်မလဲလို့ ဂျီးဇက်ကို မေးကြတယ်...

ဂျီးဇက်ဟာ သူတို့ကို မော်မကြည့်ဘဲ သူ့လက်ချောင်းနဲ့ မြေကြီးပေါ်မှာ စာရေးနေတယ်တဲ့. . . တစ်စုံတစ်ခု မပြောမချင်း ဒီလူတွေက မေးနေကြတယ်..

ဒီတစ်ခါမှာ ဂျီးဇက်က သူတို့ကို မော်ကြည့်ပြီးတော့ "

သင်တို့ထဲက အပြစ်ကင်းတယ် ဆိုတဲ့ သူဟာ ရှေးဦးစွာပဲ အဲဒီအမျိုးသမီးကို ခဲနဲ့ပစ်" လို့ပြောလိုက်တယ်. . .
ဂျီးဇက်ရဲ့ စကားကို ကြားရတဲ့အခါမှာ အဲဒီလူတွေဟာ ထိတ်လန့်သွားပါလိမ့်မယ်. . .

လူ့စိတ်ဟာ နာရီတိုင်း ၊ မိနစ်ပိုင်းအတွင်းဘာတွေ တွေးနေလဲ ၊ စိတ်ထဲမှာ ဘာတွေဖြစ်နေသလဲဆိုတာ အသေအချာ၊ မညှာမတာ ကြည့်လိုက်ရင် အလိုလေး. . . ကောင်းတာကနည်းနည်းရယ်. . . မကောင်းတဲ့ မသန့်ရှင်းတဲ့ စိတ်တွေ ၊ အပြစ်တွေက အများကြီး အများကြီး မှ အများကြီးပါ. . . ဒီလိုစိတ်မှာ အပြစ်တွေရှိနေပုံကို အဲဒီလူတွေ သိမြင်သွားပုံ ပေါ် ပါတယ်...

ဒါကြောင့် ပြည့်တန်ဆာမကို ခဲနဲ့မပေါက်ဖြစ်တော့ဘဲ တစ်ယောက်နောက် တစ်ယောက် လိုက်ပြီး ထွက်သွားလိုက်တာ ဘယ်သူမှ မကျန်ရစ်တော့ဘူးတဲ့ . . ဂျီးဇက်က ပြည့်တန်ဆာမကို နောင်မှာ ထပ်ပြီး အပြစ်တွေ ၊ မကောင်းမှုတွေမလုပ်နဲ့လို့ ဆုံးမပြီး သွားလိုရာသွားဖို့ ခွင့်ပြုလိုက်သတဲ့. . .

လူအများစုဟာ မကောင်းမှုကို လူတွေမသိအောင် ခိုးကြောင်ခိုးဝှက်နဲ့ လုပ်တတ်ကြတယ် . . . အဲဒီလိုလုပ်ပြီးတဲ့ အခါမှာ ငါလုပ်တာကို ဘယ်သူမှမသိဘူး ဆိုပြီး ကျေနပ်နေတတ်သေးတယ်. . ရှက်ဖို့အကောင်းဆုံးဟာ ဘာလဲဆိုတော့ ဘယ်သူမှ မသိဘူးလို့ထင်ပြီး ကိုယ်လုပ်ခဲ့တဲ့ အလုပ်ကို ကိုယ်ကိုယ်တိုင်ကတော့ အသေအချာ သိမြင်ခဲ့တာကြောင့် ကိုယ်တိုင်သက်သေ ဖြစ်နေတယ်ဆိုတဲ့ အချက်ပဲပါပဲ. . .

"မကောင်းမှုပြုသူအတွက် ဆိတ်ကွယ်ရာအရပ်သည် လောက၌ မရှိ " လို့ ဂေါတမဗုဒ္ဓက ပြောခဲ့ပါတယ်. . . ကိုယ်တိုင်သက်သေဖြစ်နေလို့ မကောင်းမှုပြုခဲ့တဲ့ မိမိကိုယ်မိမိ ရှက်တတ်ရင် မိမိရဲ့ကိုယ်ကျင့်တရားကို ထိန်းသိမ်းပြီးသားဖြစ်မှာပါ. . .။

နန္ဒာသိန်းဇံ (မနက်ဖြန်များကို ဖြတ်သန်းနေသော စိတ်ကူးများ)

အားလုံးကိုချစ်ခင်လေးစားလျှက်...